Supangle və tort

Deməli, bütün günü tort istəmişəm, amma... amması yoxdur. Mağaza tortlarını yemirəm, çünki həm çox dadsızdırlar həm də çox zərərlidirlər. Ona görə 'last minute cake' hazırladım və sizə bu dadlı və asan resepti təqdim edirəm.

İlk öncə supangle (ingiliscə: pudding) hazırlamaq lazımdır.

Supangle ləvazimtları:

• 3 1/2 stəkan süd
• 7/8 stəkan şəkər tozu
• 3/4 stəkan un
• 1/2 stəkan kakao tozu
• 1/3 stəkan əridilmiş yağ
• 3/4 stəkan tünd şokolad

Südü, şəkər tozunu, unu və kakonu bir qazanda qarışıdırın qazın üstündə. Hardasa 6-7 dəqiqə qarışdırandan sonra məhlulunuz qatılaşacaq. Bu an əridilmiş yağı və tünd şokoladı qatın məhlulunuza, yaxşıca qarışdırın. Hardasa 3 dəqiqə qarışdırdıqdan sonra, qazanı qazın üstündən götürün və supanglenizi keramik qab(lar)a tokün.

Bu an iki seçiminiz var: supangleni elə-belə yemək, və ya torta çevirmək.

Torta çevirmək qərarına gəlsəniz, onda peçenyelər götürün və qaba düzün. Mən 'cici bebe' peçenyelərindən istifadə etdim, amma billə peçenyelər də yaxşı variantdır. 1 qat qaba düzəndən sonra, peçenyeləri üstünə biraz (çox az) süd səpələyin əlinizlə ki, tam quru olmasın. Birinci peçenye layınızın üstünə supangledən tökün istədiyiniz qalınlıqda və yayışdırın. Onun üstünə 1 lay da peçenye düzün və əvvəlki qaydada süd və supangle mərhələlərini təkrarlayın. Mən öz tortumu 4 lay peçenyedən düzəltdim. Siz də ürəyinizə yatan sayda lay düzəldin. Axırıncı qat supanglenizi vurandan sonra, tortunuzun üstünü meyvələrlə, püstə ilə, qoz-fındıq ilə bəzəyə bilərsiniz.

Tortunuz tam hazır olandan sonra sərin yerə/soyuducuya qoyun minimum 1 saatlıq, həm peçenyelər şokoladı canına hopsun həm də tort halına düşsün.

Ən sadə alma piroqu!

Xəmiri:

• 1 stəkan əridilmiş yağ
• 1/4 stəkan şəkər tozu
• 2 yumurta
• 2 stəkan (və bir az da artıq) un

Filling (azərbaycanca qarşılığını tapa bilmədim):

• 5-6 orta ölçüdə alma
• 3/4 stəkan şəkər tozu
• 1/2 çay qaşığı darçın
• 3 xörək qaşığı un

Hazırlanması:

Orta ölçülü qabda əridilmiş yağı, şəkər tozunu, 1 bütöv yumurta və 1 yumurta sarısını yaxşıca qarışdırın; daha sonra unu hissə-hissə töküb xəmir əmələ gələnə kimi qarışdırın. Kənara qoyun, 30-45 dəqiqə qalsın.

Bu müddət ərzində almaları soyun və doğrayın balaca hissələrə. Bir qabın içində şəkər tozunu, darçını, unu qarışdırın; almaları əlavə edin və yenə qarışdırın.

Xəmirinizi bir kiçik və bir böyük hissələrə bölüb, böyük hissəni orta/böyük ölçülü tavanın içində yayışdırın. Almaları tökün üstünə; kiçik xəmir parçasını almaların üzərindən yayın; artıq qalan yumurta ağı ilə həmin üst xəmiri qlazurlayın; üstünə 2-3 yerdən kəsik qoyun; və sobada 30-45 dəqiqə bişməyə qoyun.

Dahi Azərbaycan nəzəriyyələri

Normal Azərbaycan cəmiyyətinin irəli sürdüyü, beynəlxalq dərəcədə təsdiqlənib sertifikatlanmış nəzəriyyələrdən bəzilərini sizə təqdim edirəm. Əgər sizin də əlavələriniz olsa, buyurub şərh bölməsinə qeyd edə bilərsiniz. Bon appetite, amigos!

1.  Əgər sən 12 illik “podruqanla” 3 gündür ki, sosial şəbəkələrə selfie qoymursansa, deməli sizin aranız dəyib, soyuq müharibə baş verib, siz artıq düşmənsiniz. Yox, ğardaş, həyat böylə möylə funksiya göstərmiyor, insanların bütün günü “takılmaktan” savayı öz şəxsi işləri də olur :)
2. Əgər hər hansısa bir kurs ucuzdursa, deməli keyfiyyət yoxdur. Yox, əgər, həmin kurs bir başqa yerdə bahadırsa, bu artıq bahadır, başqa izahı yoxdur. Qadam, ataş, manıs, bir dərs get, sonra bax gör xoşuna gəlir ya yox?!
3. Əgər sən TQDK imtahanından 637 bal toplamısansa, onda ən xeyirsiz ixtisas olsa belə, birinci ən yüksək ballı ixtisası yazmalısan ixtisas seçimində. Dəxli yoxdu, sən coğrafiya müəllimi olmaq istəyirsən ya elektromühəndis, əgər sənin balın uzaylılığa çatırsa, deməli sənin qismətində uzayçılıq oxumaq varmış; ondan aşağı bal tələb edən ixtisasları ağlının ucundan belə keçirtmə, ok? Yoxsa nəslin-kökün adına ləkə gətirmiş olacaqsan.
4. Əgər qatıq ağdırsa, deməli ya yaşıldır, ya bənövşəyidir, ya da qara. Başqa seçimləriniz yoxdur.
5. Əgər sən itlərdən, pişiklərdən, soxulcanlardan qorxursansa, deməli sən homofobsan. Yox, əgər sən soğan, çuğundur, kələm yemirsənsə, deməli sən yenə də homofobsan. İnsan övladı, başa düşdük də, homofob sözünü təzə öyrənmisən.
6. İngiltərə təkcə Londondan, Amerika təkcə Nyu York və Vaşinqton DiSidən, Avstraliya təkcə Sidneydən, İsveç təkcə Stokholmdan, Rusiya təkcə Moskvadan, Macarıstan təkcə Budapeştdən, İtaliya təkcə Romadan, Yaponiya təkcə Tokyodan ibarətdir. Hə qaqa, başqa şəhər, kənd, irayon, vilayət yoxdur oralarda :)
7. Çinin paytaxtı Kitaydır (!!!) .
8. Qızın 22 yaşı varsa və hələ də təhsil alırsa/işləyirsə/özünə karyera qurursa, evdə qalıb, alan olmayajax onu. Bıy başınıza xeyir. 
9. Axşam süfrəyə ət yeməyi gətirilmədisə, yeməyin 50%-i yağdan ibarət deyilsə, ailə büdcəsində ciddi problemlər yaranmağa başlayıb, deməli.
10. Evdə əzbərlədiyin o 1 bənd rus dili mətnini ictimaiyyətdə addım başı işlədə bilirsənsə, sən rus dilinin anasısan, atasısan, əmisisən, sən bomba qaqaş/bacısan belə də ki! Gör sən hələ ingilis dilində "Ok bye!" deyəndə ətrafındakılar sənə necə dahi biri kimi baxır ingilis dilini sökə bildiyinə görə. Hələ hələ türk dilini demirəm, özünüz artıq təsəvvür edin necə güclü rəğbət qazandığınızı. Ulala. Amma nə badə Azərbaycan dilində kəlimə də gətirəsiniz dilinizə!

Təbii ki, bunların hamısını zarafata yazmışam (içində müəyyən qədər həqiqət olsa da). Ümidvaram heç kim ürəyinə yaxın alıb nervlərini oyandırmaz. Hər bir cəmiyyətin qüsurları da var, özəllikləri də.

Məsələn, Böyük Britaniyada xaricilərə çox çətinliklə iş verilir, hətta sənin 10 il iş təcrübən olsa belə, səndən tələb edəcəklər ki, 3-4 ay (çox da ola bilər, nisbətən az da ola bilər) onlara pulsuz işləyəsən (və anlayacağınız qədər, pulsuz iş üçün viza verilmir - mədəni yolla "qırıl" deyirlər, anlayın lan); istənilən cəhətdən diskriminasiya yüksəkdir (bilmirəm mən cəmiyyətə çox diqqət edirəm deyə görürəm bunları ya öz təcrübəmə də toqquşan nüanslar olub); konservativ olduqlarına görə adətən sosiallaşmanı digər xaricilərlə kompensasiya etməli olursan.

Məsələn, ABŞ-ın hər ştatında düşük qanunlar var - Alabamada bazar günləri domino oynamaq qeyri-qanunidir; bir vaxtlar Oklahoma ştatında döymə elətdirmək insanı türməyə düçar edərdi; rəsmi sertifikatın yoxdursa, Vayominq ştatında yanvardan ta aprelə qədər (aprel daxil olmaqla) dovşan şəkli çəkə bilmərsən.

Məsələn, Səudiyyə Ərəbistanda qadınların maşın sürməsi və siyasi seçkilərdə iştirak etməsi qeyri-qanunidir (hərçənd, 2015-ci ildə qanuniləşdirmə söhbətləri gedir).

Məsələn, Hindistanda əgər kişinin maddi borcu varsa, borcu bitənə kimi öz həyat yoldaşını kirayə vermək hüququna malikdir :)

Və sair və ilaxır.

Belə.

-Türaynə :)

Şokoladlı sufle

Şokolad xəstələri üçün çox asan və dadlı bir resept - sufle!

Məmulatlar:
3 xörək qaşığı duzsuz yağ
2 xörək qaşığı kakao
100 q. tünd şokolad
1/2 çay qaşığı vanil tozu
2 yumurta sarısı
2 yumurta ağı
2 xörək qaşığı şəkər tozu
1 çimdik duz
1/2 çay qaşığı soda

1 standart kasa boyda keramik qab

Hazırlanma qaydası:

• keramik qabı yağlayın, kakao səpin qaba
• şokoladı və yağı bir qabda əridin və qarışdırın (qabı birbaşa qazın üstünə yox, qaynar suyun üzərinə qoyub əritsəniz, o halda şokolad yanmaz və daha rahat olar qarışdırmaq)
• vanil və yumurta sarılarını qatın, qarışdırın

bu arada sobanı yandırın ki, isinsin.

• ayrı bir qabda yumurta ağlarını və şəkər tozunu qarışdırın; soda və duzu əlavə edin
• 2-ci qabdakı qarışığı şokolada qatın və yaxşı-yaxşı qarışdırın.

Nəhayət, unsuz düzəltdiyiniz xəmirinizi keramik qaba töküb isitdiyiniz sobaya qoyun. Bişməyi, hardasa, 25-30 dəqiqə çəkir.

Narxoz böyük məktəbdi..!

Narxozda ikinci kursun yay sessiyasında (13 iyun 2012) imtahanların birinə biraz tez gəlmişdim universitetdə bir işim olduğuna görə. Biraz gözləməli olmuşdum, yaxınlıqda iki oğlan durmuşdu, gəlib gedən hər kəsə repliklər atırdılar, uzaqdan gördüklərini də öz aralarında analiz etməyə çalışırdılar. Birdən oğlanların biri barmağın uzaqdan gələn bir qıza uzadıb dedi ki, o tərbiyəsiz qızdı. Yanındakı soruşdu ki, niyə? O biri dedi ki, çünki həmişə hər kəsin üzünə gülümsəyir.

Belə. Yəni ki, dəxli yoxdu özünü necə aparırsan, hər kəsi qane edə bilmərsən ətrafında. Bəzilərinə gülümsəməyin sənə tərbiyəsiz adı qazandırar, bir başqası üçün sənin gülüşün onun enerji mənbəyi ola bilər. Birisi üçün sənin soyuq xarakterin lovğalıq ola bilər, digəri üçün ağır adam (“çişi-mişi”) sayıla bilərsən. Kiminləsə səbəbli yerə ünsiyyətdən qaçmağın kobudluq görünə bilər amma hər kəs problemi özündə axtaracaq dərrakəyə malik deyil təəssüf ki. Və ən böyük təəssüf də ondadır ki, məhz bu cəmiyyət insanı yalnız 2 yolla tanımağa üstünlük verir:

1) başqalarının dediklərinə inanmaqla

2) ünsiyyətsiz, kənardan “müşahidə aparmaqla”

Koroçe, sözüm ondadır ki, Narxoz böyük həyati məktəbdi..

Bəzən, sadəcə olmur eyni tempdə davam etmək…

Bakıda qalsaydım mən də bu il məzun olacaqdım, magistratura hayında fırlanacaqdım, bakalavrı bitirməyə – böyük ehtimal ki – sevinəcəkdim, şikayət mənbəyi olan Narxozdan, müəllimlərdən, uşaqlardan canımı qutardığıma görə yerə göyə sığmayacaqdım və məzun olacaq hər kəsin süni ağlaşma statusların oxuyub kilo-kilo ət tökəcəkdim. Amma Bakıda qalmadım, məzun olmadım, magistratura havasını atdım, ət-tökənski statuslardan olmasa da narxozdan canımı qutardım və yenidən bakalavra başladım. Bu dəfə qürbət eldə. Bakıda universitetə həvəslə və ya həvəssiz qəbul oldun, fərqi yoxdur, onsuz da orda universitetə qəbul olan hər kəsin bir ortaq şüarı var: universitetə bir girən sevinir bir də bitirən! Mən də öz ilimin qalibləri kimi çox sevinmişdim ki, 605 bal ilə Azərbaycan Dövlət İqtisad Universitetinin Mühasibat Uçotu və Audit ixtisasına qəbul olmuşam. Pfft. Hər şey qəbul olduğum ilin (2010) 15 sentyabrından bəlli oldu – 4 illik haqsız zülm məni gözləyirdi. Ya 4 il ev və universitet arasında yol ölçməliydim ya da özümə “gün ağlamalıydım”. Birinci kursu planlar qurmaqla keçirtdim. İkinci kursda Universitet-Unibank-Ev qədər genişləndirdim marşrutumu. Üçüncü kursun başlağıcında artıq bütün fikirlərim dəyişmişdi – mən narxozda qalmaq istəmirdim daha! Unibankdan çıxmışdım, IELTS imtahanı vermişdim, elə təhsil aldığım universitetdə də könüllü olaraq işə müraciət etmişdim. Könüllü işinə qəbul oldum da, digər bir işə də qəbul oldum sonradan və hətta IELTS balımdan da yararlandım. Nəticədə, universitetdən bilik qazanmasam da, digər fürsətlərdən yararlanıb bilik boşluğunu iş ilə kompensasiya etməyə çalışdım. Üçüncü kursun xülasəsini versəm, deyərdim ki, Azərbaycanda yaşadığım müddətdə yeganə düzgün qərarlar verdiyim, ağılla hərəkət etdiyim il olub. Və onun nəticəsi olaraq, 3 il universitet həyatını heyif etməyimə baxmayaraq hal-hazırda Böyük Britaniyada Nyukastl Universitetində yenidən bakalavr təhsili alıram. Bu pilləyə gəlib çıxmağımda mənə kömək və dəstək olan hər kəsə cani-könüldən təşəkkürlərimi yollayıram. Ən əsası istisnasız bütün müvəffəqiyyətlərimə mənimlə bərabər və hətta məndən çox sevinən valideynlərimə dərin minnətdarlığımı çatdırıram bütün dəstəkləri, inamları, güvənləri, qayğıları, sevgiləri, motivasiyaları və hər zaman yanımda və başımın üstündə durduqları üçün! Anamın Atamın məni pediatr kimi görə bilmək arzularını gerçəkləşdirə bilməsəm də, övlada veriləcək ən dəyərli hədiyyə – əsl savada sahib olmaq arzuları uğrunda mübarizə apardığımı zənn edirəm. Oxey, düzdü, hərdən çox darıxıram burda təklikdən, amma həyatımdan 40 il alan narxozda keçirtdiyim savadsızlıq stressindənsə başımda az-çox biliyin olmasını tərcih etməyə davam edəcəm Kim nə qədər heyfislənib mənim 3 ili atıb gəlməyimə, çox gözəl anlayıram, amma bəzən, sadəcə olmur eyni tempdə davam etmək…

-Sizin Turanə 

P.S. Təhsil almaq üçün heç vaxt gec deyil. Cəmisi 1 ilim qalmışdı Narxozda, amma bilik sahibi olmadan diplom yiyəsi olmağın nə faydası? Sizə xeyri dəyməyən, heç nə mənimsəmədiyiniz, yararlana bilmədiyiniz, sadəcə adı üstündə olan təhsil ocağını önəmsəməyə dəyib-dəymədiyini təkrar düşünməyə dəyər. “İl itirmək” qorxusu sizi ya savadsızlığa sürükləyəcək ya da sonradan peşmançılığa…

Amsterdam, Hollandiya

Ərazisinin dörddə birindən çox hissəsi dəniz səviyyəsindən aşağı olan Hollandiyanın Amsterdam şəhərinədir səfərimiz. Amsterdam təkcə Avropada deyil, eləcə dünyada ən gözəl, ən təmiz və ən gəzməli-görməli şəhərlərdəndir! Mütləq pulunuzu yığıb bir dəfə də olsa bu şəhərə səyahət edin.

• Hollandiyanın torpağı bataqlıq və gillərdən ibarət olduğu üçün burda demək olar ki, tülpanlardan başqa heç nə bitmir. Hətta evlər belə taxta dirəklər üzərində tikilir ki, bataqlığa məruz qalmasın. Tülpanlar demişkən, Amsterdama səfər etsəniz, Keukenhof Bağlarına getməyi unutmayın. Keukenhof Bağları Avropada birinci, dünyada isə, ikinci ən böyük tülpan bağı sayılır (Dubay Möcüzə Bağları birincidir).
• Amsterdamda əhalidən çox velosiped var. Şəhərin 700 min sakini olduğu halda, 1 milyondan da çox velosipəd var bu şəhərdə. Küçələr və körpülər ensiz, maşınsaxlama məntəqələri çox baha olduğuna görə Amsterdamın əhalisi velosipedlə səfər etməyi tərcih edir.
• Amsterdam aeroportu dünyada yeganə aeroportdur ki, orada muzey var. Bundan əlavə Amsterdamda olarkən mütləq səyahət etməli muzeylər var ki, bura Van Gogh Museum, Anne Frank Haus, Sex Museum, Gassan Diamonds, Science Center NEMO və sair daxildir.
• Amsterdam dünyada ən diverse (rəngarəng deyək bu halda) şəhər sayılır, çünki burada 170-dən çox müxtəlif millətlərin sakinləri yaşayır.

Bu şəhərdən ən yadda qalan xatirələrim:

• Qırmızı işıqlar məhəlləsini gəzib, dolaşıb və axırda tən ortasında bir kilsə görmək idi. Qeyd edim ki, bu "məhəllədə" şəkil çəkmək qəti qadağandır. Yaxşı ki, telefonumun və fotoaparatımın batareykası bitmişdi, yoxsa məhəllənin şəklini çəkmək ürəyimdə qalacaqdı.
• Pasport yoxlanışı. Kiçik avro-turumuzdan Hollandiya yeganə ölkə idi ki, nə ölkəyə daxil olanda nə də ölkədən çıxanda heç kim bizim pasportumuzu yoxlamadı. Tanış-tunuş deyəndə ki, bu ölkədə hər şey qanunidir, mən onu istisnalarla qavrayırdım. Lakin, doğurdan da hər şey qanuni imiş Hollandiyada.
• LGBT. Hollandiya mavilərin ölkəsi sayılsa da, Amsterdamda bu quruma aid insanlara rastlaşdığımı xatırlamıram.
• Küçə kartoşkası. Mən belə adlandırıram bunu çünki çöldə bir butkada satılan kartoşdu. Normalda Anamın sözündən çıxmayıb küçə yeməyi yeməyən mən, acından qırıldığım üçün və gecə olduğundan kafelərin, restoranların iş vaxtının bitdiyi üçün küçədə ilk gördüyüm qida məhsuluna hücum çəkdim. Bəxtimdən də, sağlam olmasa belə, tövsiyə edəcəyim dərəcədə dadlı bir junk food idi. Amsterdamda olanda mütləq orda konus içində satılan qızardılmış kartoşkalardan alıb yeyin! Dadacağınız ən möhtəşəm kartoşlardan biri olacaq! Amsterdam Centraal qatar stansiyasına yaxın ərazilərdə yerləşir. 

Amsterdamın təyyarədən görünüşü

Amsterdamın təyyarədən görünüşü

Amsterdam Centraal - mərkəzi qatar stansiyasının önündə

Amsterdamda tipik küçələrdən biri

Hotel Di-Ann və suvenir mağazaları, Amsterdamın mərkəzində

I am sterdam - Amsterdama gedib və bu yazı ilə şəkil çəkdirməmisinizsə, demək siz nə qədər kiməsə öz səyahətiniz barədə
danışsanız da sizin əlinizdə sübut yoxdur ki, siz Amsterdamda olmusunuz :D

Homomonument ərazisi

Keukenhof Bağlarında gölkənarı park

Keukenhof Bağlarının kənarındakı müxtəlif rəngli tülpan tarlaları

Clogs - Hollandiyanın ən qədim ayaqqabılarındandır, taxtadan hazırlanır və hazırda turist aktrasyonlarındadır.

X-tra huge Clog

Amsterdamın hər künc-bucağında coffeeshop'lara rast gələ bilərsiniz. Ağlınız ciciş-miciş kofelərə getməsin,
bunların hamısına nəşə qatırlar.

Amsterdamı əks etdirən iki rumka :)